Fetn Bana Tandla – Kurzgeschichten im Wiener Dialekt

Fetzn, Bana, Oidpapier, Oideisn. I nimm Ollas, Fetzn, Bana, Oidpapier. Griaß Ihna gnaä Frau, I gib Ihna gern ah poor Greschaln.

Wos, Ihnan Oidn woins ma audrahn? Saufn tuat ah? Naujo fia de Spiritus Fabrik hot Er wohrscheinlich z´wenig Alkohol in eam. Ahso, net amoi aufn Flohmorkt nehmans Eam? G´hoitns Ihna den B´suff.

Oba I vasteh jetzta warum Ihna Oida saufft. Se haum Hoor net nua aun de Zähnt. Irgendwo untn steht ah ah Hoor eine und des ratzt des Gemüt. Dazua ah schorfes Mundwerk und richtige kebbel Zähnt. Waunns mehrere von Ihnan Typ gabat, tät kana Heiraten, oba waunn de Mauna des vurher wissatn, tät de Wöd aussterbn. Se san jo vahärmt, weu Ihna Traumprinz vur lauta Vazweiflung si jedn Tog dicht mocht, aundas san se wohrscheinlich net zum aushoitn. Wos se brauchn is ah Duckmäusa, ah richtigs Wasal, der Ihna jeds Wurt von Ihren schmoin Lippn olest und knian muaß, waunn Er wos augstöt hot. Wos haums g´sogt? I soi mei Pappn hoitn? Sowos, net amoi mei Hund deaf so mit mir redn, tans Ihna mäßigen, aunsunnstn kenntats sei, das I Ihna Fiaß moch, damische Umurkn.
Fetzn, Bana, Oidpapier, Ollas wird kauft Oideisn, Kupfa Aluminium.

Griaß Ihna Herr Bezirksrot, wos? I soi den Dingsdo nehma, is net Ihna Ernst, jetzt sogns vielleicht no das fia Eam no wos zoit haum woin.
Den Blautäubling kennans Ihna g´hoitn, fia den kriangs net amoi zehn Groschn. Weu den Bledsinn , den der verzapft, vajauckt jo jeden hoibwegs normalen Menschn.
Fetzn, Bana, Oidpapier, Ollas wir kauft, Oideisn, Kupfa, Goidzähnt waunns echte san. Ah griaß Ihna Herr Bezirkssekretär, haums vielleicht ah an Kollegen, dens los wern woin? Gibt net vü Leit de an Negarantn so an schorzn Murl haum woin, der geht jo jedn Sunntog Kerzlschlickn und ma sicht wia eam da Heuligenschein druckt, so leidend schaut Er drei. Oba daham seine Kinda haun und sei Oide Betakln, des hauma scho gern. Fetzn, Bana, Oidpapier,

Ollas wird kauft, Oideisn, Kupfa nua kane Fetznschedln. He du Rothaut, wüst ma wos auf mein Wogn schmuggeln, den Genossn der Petite g´mocht hot, obwoi Er eh ah schene Gasch olle Monat hot. Den kaunnst da g´hoitn, der vasübat jo no mei Wor. Vadaummt no amoi, I nimm nua fetzn, Bana, Oidpapier, Oideisn, Kupfa. Wos de Bagasch mia Ollas audrahn wü, is net zum glaubn.

Friedrich

1 Star2 Stars3 Stars4 Stars5 Stars (Keine Bewertungen)

Schreibe einen Kommentar

Deine E-Mail-Adresse wird nicht veröffentlicht. Erforderliche Felder sind mit * markiert.