Kritisch betrachtet
von Vivienne – Juni 2001
Der Weltuntergang
(Ein nicht ganz ernst gemeinter Nachtrag zu Valencia Bayern München im Champions-League-Finale)
No, glei gehts an. Heut wern die Bayern dran glauben, oder i haß Ferdl. Eviva Espania!!! Eviva Valenzia!! Mit dem Charly hab i gwettet, daß die Bayern heut Saures kriegen. 500,–, leicht verdientes Göld, so viel Glick haben ned amal die Scheiß-Bayern, so wie gegen Schalke, des gibts nur amal… Heast Schatzi, wieviel Bier ist denn eingekühlt? Schatzi!! Geh jetzt schau doch net so bes, weil ma uns die Rosamunde Pilcher ned anschauen. Aber des muaßt verstehen, des is des wichtigste Spiel im ganzen Jahr, und die Bayern kriegen ans drauf! Schatzi! Geh, Schatzi, sei do ned aso! Na, daun spinn di aus, i geh mir selber um die Halbe. Versteh aner die Weiber!
Na gut, wenigstens des Bier ist kalt. Geht grad an. He, wo san die Chips? Schatzi, Schatzi, wo san die Chips…? ? Na, ois muaß ma si selber holen. In welchem Kastl …? Na, da sands ja eh. Heast, was is da los? I man i dram! Elfer für Valencia! Das geht ja besser an, wia i ma dacht hab. Gemma, gemma, hauts die Bayern eini, ja, ja, ja Goal!!!!!!! Wahnsinn! Bayern, des wars, ihr kinnts scho brausen geh. Hey, da Charly des Weh, der wird bled schauen, 500 Schilling kost des. Ob i eam anrufen soll und eam a weng häkeln? Haha, des wa oba bes, des heb i ma fir nach dem Match auf! Des blede Gsicht vom Beckenbauer mecht i daun a sehen, nach dem Match, auf des freu i mi schon…. Hey, was is jetzt los, Elfer fir die Bayern, is der Schiedsrichter deppert worden? Des war doch niemals a Elfer! Haß wirds do herinnen! Des war doch niemals a Elfer! Na, gottseidank, abgewehrt! Des halt ma doch im Kopf ned aus! Aber der Goalie, von die Spanier, der is eh guad, der hat ned gschlafen. De Spanier san super Spieler. Da brauch i gleich no a Bier! Schatzi, wir führen 1:0 ! Schatzi!!! Weiber, i sag das. Und des alles wegen der depperten Rosemund Pilcher. Was weiß die Frau scho von der Faszination von an guaten Fuaßballspül! Eh! Is da wirklich nur mehr a Bier drinnen? Schatzi…? Jetzt kann i ma no des Tragl aus dem Keller holen und einkühlen. Des hat die Meine absichtlich gmacht… Na, dann hol i mas holt. Hoffentlich versam i nix Wichtigs vom Match….
…..
Hot sie eh nix getan. Na, die Spanier spielen des scho ume, de san routiniert, de packen des schon. Eviva Espania! Heast, der Charly wird bled schauen. Aber i habs glei gesagt, Bayern hat ka Chance, so viel Glick gibts ned…Pause; na guat, schau ma wegen was zum Essen, i hab an Hunger kriagt. Soll i ma vielleicht gschwind a Pizza in die Microwelle haun? Die Dame hat sie ja ins Schlafzimmer verzogen…Des dauert eh nur a paar Minuten… Quatro Staggione, schaut mi guat an. Wieviel Minuten? Nau, sagen wir 15 Minuten, daun wirds schön knusprig. Derweil hol i ma noch a Bier. Is halt noch ziemlich lau, die Meine hat ma ja nur zwa Bier in Kühlschrank…Was waß sie scho davon, was ma fir an Durscht kriegt beim Fußball schauen. A, die Pizza is fertig, heast is die haß, und ganz hart, au, jetzt hab i mi a no brennt, scheiß Microwelle. Des tut aber gscheit weh, is a mords Blasen da. Iß i halt nix, macht a nix…. A, des Match is scho weitergangen, heast san de narrisch???? 1:1, wie gibts denn des??? Da braucht ma nur amal a Minutn den A… aussehalten, und schon lassn de Scheiß Spanier nach! I habs eich gsagt, ihr derfts eich as ned in der leicht lassn… Meine 500 Schilling!!!! Haß is es do herinnen, i kipp amal des Fenster. Was reg i mi auf, was reg i mi auf, des geht no über a halbe Stund, des schau i mir an, daß die Bayern des Match no umdrahn, des wa a verdammte Sauerei…Des gibts gar ned, so viel Glick haben die ned, nie im Leben… Also haß is ma schon. Na, dann hol i ma no a Halbe…
….
Also i kapier des ned. De Scheiß Spanier kriegen den Ball nimma über die Linie, i hoids im Kopf ned aus. Wenns bled hergeht, miassn ma a nu in die Verlängerung. Wauns nur ned so haß da herinnen war. Wieviel Minuten gehts no? Nachspielzeit. Jetzt reissts eich zsamm, es geht um meine 500 Schilling…! Na! Na! Verlängerung! I brauch no a Bier, des halt ma ja mit de Nerven ned aus…und haß is es. Was, scho wieder Bier aus? Jetzt muaß i wieder in Keller, i was gar ned, ob noch was da ist. Bier is kans mehr da, nemma den Wein, i hab an Durscht…. Herst, de schiassn einfach ka Goal mehr! Sche langsam wer i unruhig, aber na, de Bayern schaffen des nie, so viel Glick gibts ned! Gibts sicher ned… oder doch…? Nau, wird des heit noch was? Waun die Spanier ned gleich a Tor schiassn, fahr i nie wieder nach Spanien auf Urlaub, de kinnan mi daun vergessen!…I fass es ned, die 120 Minuten san a glei um… Elferschiassn? Is mir haß! Na, des wül ma in Kopf ned eini! Wie kann ma nur so vernagelt sein! Eviva Espania . .das i ned lach! Hochbezahlt, und bringen nix zsamm! I kann scho nimmer hinschauen… Wo is de Flaschn, a scho wieder leer, i halts ned aus, des gibts ned, na, na, na,…de Bayern hams gschafft, so viel Glick gibts doch anfoch ned….!!!!!
(Über den Rest des Abends gibt es keine gesicherten Angaben)
Link: Alle Beiträge von Vivienne